新年穿搭｜3個必學「紅色穿搭法則」 令你過年著得喜慶又優雅
農曆新年就快到，大家諗好過年嗰幾日點樣打扮未？如果想著紅色衫應下節，但又擔心全套紅色衫唔易駕馭，不妨參考以下幾個穿搭方法，優雅地散發喜慶感覺。
穿搭1：素色為主 & 善用紅色配件
鮮色有放大效果，成身紅色容易暴露身體缺點，可以考慮使用紅色配件或局部紅色代替大紅色衣服，例如紅色頸巾、紅色帽、紅白黑色格仔裙等等。上衣顏色可以選擇白色或黑色等素色，令人將焦點放響紅色配件上，突出節慶顏色，應節得來又時尚。
穿搭2：選擇不同深淺紅色 & 慎選材質
紅色都有好多色階，除咗大紅色外，亦可選擇沉穩優雅嘅酒紅色，或者柔和有活力嘅淡粉紅色，一樣有過節氣氛之餘，亦比較容易駕馭。另外，各種質地呈現出來嘅感覺都唔一樣，例如粗冷衫有厚重感、雪紡散發柔美感、針織通常感覺比較知性，可以根據想呈現嘅感覺來挑選衣服質地。
穿搭3：加添其他顏色平衡鮮紅色
如果選擇著鮮紅色上衣，但又擔心太過誇張的話，可以大面積地加添其他顏色來平衡搶眼嘅紅色，以米色、黑色或啡色配襯都好好睇，喜慶得來又唔會太浮誇。
