【夏季湯水食譜】入地老鼠老黃瓜瘦肉湯　消暑清熱／袪濕解毒／益氣健脾

依排個人成日都好攰好攰，感覺周身唔舒服咁，可能係晚晚開冷氣瞓又成日飲凍嘢，所以令到體內濕氣重所影響。

原本都打算簡單啲煲薏米水袪濕，不過係我入貨時同店主姐姐傾開，佢就介紹我煲依個入地老鼠老黃瓜瘦肉湯，可以袪濕解毒之外，仲有助益氣健脾，更加啱依家嘅天氣飲呀~

材料：

老黃瓜……… 1個
入地老鼠…… 1両
牛大力……… 1両
土茯苓……… 1両
茯苓………… 1両
白扁豆……… 1両
白朮………… 半両
蜜棗………… 3粒
瘦肉………… 約$40

做法：

1. 老黃瓜去籽切塊。

2. 瘦肉洗淨汆水。

3. 其他藥材浸洗一陣。

4. 煲內放約3L水，然後隨水加入所有材料。

5. 待滾起後，繼續用大火加蓋煲約15分鐘。

6. 之後轉慢火加蓋煲多2小時。

7. 最後加鹽調味，就可以飲得啦。

雖然以藥材為主，不過大部分都唔算係濃味，而且又有一個老黃瓜，所以啖湯特別甜，我家兩位老細都大讚好飲呀！

以下係各食材嘅功效，可以參考一下 (網上資料)：

老黃瓜 – 有消暑清熱、降燥火利水、解毒功效

牛大力 – 有補虛潤肺、強筋活絡及清熱解毒作用

土茯苓 – 有清熱解毒除濕及通利關節之效

茯苓 – 利水滲濕、利尿，可改善記憶力，還有幫助鎮靜的功效

白扁豆 – 有補脾胃，和中化濕，消暑解毒的功效

白朮 – 補氣健脾，燥濕利水

蜜棗 – 止咳潤肺、化痰平喘功效

溫馨提示：

– 由於個別人仕體質不同，所以大家記得煲之前了解下自己，如有疑問，請先向註冊中醫查詢！

文章獲 小小豬Kinsey 授權轉載

～ 金銀島新設Whatsapp群組，發放最新50+相關資訊，歡迎您一齊分享，傾下計。 馬上 按此入谷 ～

相關閱讀：【祛濕湯水食譜】蓮藕栗子赤小豆扁豆豬骨湯　一星期煲一次　健脾化濕、益氣開胃