一齊做美魔女！50歲凍齡康華3大保養秘訣 超簡單你我都做到
啱啱踏入50歲的康華，最近拍綜藝節目《七線人棄王》，拍埋5個後生仔度一點都唔顯老，依位凍齡美魔女分享3個超簡單保養秘訣，只要有決心，你同我都可以做美魔女/ 美魔男！康華響《七線人棄王》裡面飾演訓導主任，戴眼鏡Missy Look打扮，同5位七線藝人陳俊堅、鄭雋熹、程浩駿、林浩文同姚宏遠大放笑彈。5位後生藝人本身都唔敢同康華傾偈，係後來先發現原來她好幽默同友善。看來依位美魔女心態好年青，同後生仔一樣有偈傾，唔會有代溝。
跟住做！美魔女康華3大保養秘訣
1. 清淡飲食 少鹽少油少肉
保養皮膚要從飲食入手，康華平時食得好清淡，主要食菜、豆腐同茄子，朝早會食小米粥。雖然無完全戒肉，但平時都好少食肉，一星期大約一兩次。煎炸食物盡量少食，同埋保持少鹽和少油。
她好鍾意飲湯同汽水，但因為飲完之後好易浮腫，所以而家都控制自己少飲，睡前更加唔會飲，以免第二日起身時有腫脹感。遇上皮膚好乾的日子，除了敷保濕面膜之外，她會多飲水、瞓返足夠，再唔得就去美容院做保濕facial。
2. 只做適量運動 不讓身體過度負荷
康華身型keep得好靚，她透露自己不時做運動，打羽毛球、游水或者散步，令肌肉唔會太鬆弛。她習慣食完晚飯後，同爸爸媽媽去公園慢行45分鐘至1小時，行完之後身體感覺比較輕盈，第二日人都精神一些。另外，她好著重腿部線條，睡前會做瑜伽同健身操伸展腿部。
不過她認為運動就好似飲食一樣，要均衡同適可而止，唔使令自己太辛苦，如果唔係會消耗太多。她眼見身邊有些朋友，明明工作到半夜3、4點，又或者朝早6點就要返工，本身休息時間已經唔夠，但都勉強去做運動，她覺得咁樣反而可能有反效果。她建議大家一定要先了解自己身體狀況係咪適合做某些激烈運動，或者係咪可以頻密地做運動，否則適得其反。對她來說，足夠休息比運動重要，每日做身體負荷到的少量運動，如果唔舒服時就應該暫停做運動。
身高165公分的她，平時維持105至106磅，放任時候會去到108磅，但如果有拍攝時，為了上鏡好睇，就一定會保持105磅以下。
3. 保持心情平穩 多角度看事情
康華在戲裡成日被安排做奸角，劇中角色情緒大起大落，不過現實中的她情緒很少有大波動，她自問是個識得保持心情平穩的人，成日諗開心事情，就算遇到唔開心的事，都會諗方法去平復心情，試下響唔同角度去睇依件事，然後就會突然發現：「其實發生依件事都係好事吖！」她說依種樂觀正面的心態係經過多年的人生歷練領悟返來的！