林超英 退休13年樂活人生:提前5年積極擴闊社交,維持至少3樣興趣

林超英先生自60歲退休,從天文台台長一職退下來,唔經唔覺已經來到第13年,響工作崗位退下來後仍然百足咁多爪,活躍參與唔同演講、就公眾議題發表意見、不時響個人Facebook專頁分享欣賞 #路邊花草 的樂趣。

林超英-退休-荔枝窩

退休生活多采多姿,林超英坦言自己響退休前5年就開始籌謀人生下半場,「打工係為咗唔打工 (即退休),所有人都要為唔打工之後做準備,等到退咗休先諗就太遲!」

退休前5年積極擴展社交圈

由於以前工作的關係,林超英成日要出席唔同場合,接觸到社會各界人士。他不諱言自己響退休前著意擴充社交圈子,每次認識到新朋友都把握機會傾下偈,睇睇將來有無甚麼可以合作,他形容過程就好似釣魚,揮出魚桿但唔知最後有無收穫。不過無論結果係點,最緊要係持開放態度,發出訊息等其他人知道自己諗法,先可以為自己製造機會。

林超英續說:「退休前就要計劃定,因為人際關係需要長時間培養。」他建議在退休前打開自己嘅心屝,多參與不同活動,重點係多接觸其他人,無論係工作上接觸到的人,定係透過興趣認識到同道都好,盡量擴闊人脈。記得盡早為未來打算,唔好只顧住返工。

正因為他不斷將社交向外伸展,主動開放的態度為他帶來好多意想不到的事情,睇落同本業和興趣風馬牛不相及的潮州商會、紅十字會、童軍等等都找上他進行各式合作,他從中有更多新發現。

林超英-退休-郊遊
與大學同學相約郊遊,一段維持了幾十年的珍貴情誼。

在職時至少維持3個興趣

除了要主動擴闊社交圈子後,林超英鼓勵大家千祈別放棄個人興趣,「想退休後快樂,響返緊工時應該維持至少3個興趣。」

他以自己為例,最大的興趣係觀鳥,亦因此認識了一班「雀友」;第二興趣係觀天,第三興趣係學外語。講起外語,原來林超英至少懂得7國語言,20歲學德文、30歲學日文、40歲學法文,到退休前幾年,56歲先開始學西班牙文。林超英話學法文同西班牙文那段時間,係工作壓力最大的時期,所以他特地跑去學外語,因為學語言需要全神貫注,正好分散注意力,暫時忘記工作上的煩惱。

百足咁多爪的他又點止得3樣興趣咁少,他近年愛上賞 #路邊花草,周不時響Facebook同大家分享花朵知識。另外,他最關心人類同地球的可持續發展,退休後專注響依類議題上,例如環境保護、氣候變化,亦在荔枝窩村推動鄉村復興。依類議題響香港雖然日漸受人關注,但推動難度甚高,不過林超英就特別鍾意做,一來自己真心著緊,二來他打趣地說:「(推動依類議題) 本來都失敗居多,失敗係正常,但成功一次就好開心。」

林超英-退休-商台
之前在商台主持《山間花開時》,分享行山賞花的樂趣。

事業型退休但視錢財如浮雲

林超英稱自己係「事業型退休」,致力發展自己喜愛的項目,亦幸運地得到各方邀請,試過一年出席過百場演講,保持一定忙碌之餘,又唔會有返工時的壓力。不過,接洽工作時他並非來者不拒,而係十分有原則 —— 講"錢"就一定唔做。人生去到某個階段,能夠視錢財如浮雲,專心於喜愛的事情上,實在係一種福氣。

退休後林超英要身兼秘書角色,親自接洽合作、排行程,由天文台台長有幾百個員工一齊工作,到退休後一人分飾兩角、大小事務一腳踢,突如其來的落差有無令他失落?想知他怎樣調節心態?立即睇:做到天文台台長純粹好彩?林超英退休13年:歲數大了,最緊要睇得低自己但不自卑

(相片由受訪者提供)

相關閱讀:社會創新運動推動先鋒 73歲 KK 謝家駒博士 :無視年齡限制,活出不一樣的人生下半場