50歲身體檢查項目！癌症的好發年紀　身體機能變差　5個必做檢查　幾耐要檢查一次？

50歲之後係癌症的好發年紀，而身體機能都逐漸走下坡，成日覺得攰同周身痛。50歲身體檢查項目一定要做依幾樣，定期檢查下，如果有病的話都可以盡早發現以利治療。

研究發現，55歲以上患癌症人士，係佔癌症族群的85%，所以50歲以後要特別留意癌症相關的檢查，以下為大家列出5個必要做的檢查項。

50歲身體檢查項目！5個必做檢查

唔止心血管，腦血管、腎血管等各種血管都要定期檢查，留意有無血管鈣化同腦中風等問題。至於最常聽到的心血管疾病，可以透過做心臟電腦掃描來了解身體情況。

大腸癌係香港第二最常見的癌症，長期壓力大、鍾意食加工食物或高熱量食物人士都係大腸癌的高危險群。透過大便隱血測試、大腸鏡檢查同埋乙狀結腸鏡檢查都可以有效篩查大腸癌。

而政府都有資助50至75歲、無大腸癌徵狀的香港居民，每兩年響私營機構接受篩查。

有食煙習慣人士固然係肺癌高危族群，但空氣污染、經常吸入油煙都有機會造成癌症出現，建議可做低劑量電腦掃描，檢查有無早期肺癌。

50歲後患上胰臟癌的機率提高，但因為胰臟響胃旁邊，就算做腹部超聲波都可能會被胃擋住，無法看清楚胰臟情況，建議做電腦掃瞄會比較適合。

隨住年齡增長鈣質流失，去到55歲左右無論男女都可能有骨質疏鬆症，提高骨折風險。如果想知道自己有無骨質疏鬆問題，可以由驗血、超聲波骨密度檢查或者X光吸收測量儀檢查得知。

男士專屬身體檢查：前列腺

前列腺癌係香港常見的男性癌症，50歲以上的男士有一半有前列腺增生的問題，建議每1至2年做一次預防性檢查。

女士專屬身體檢查：子宮頸癌

子宮頸癌係香港女性常見的癌症，科學證實定期做子宮頸篩查可以有效預防，建議每年做一次抹片檢查。

幾耐做一次身體檢查？

建議50歲開始，每2年做一次詳細的身體檢查；而去到60歲時，建議每年一次。如果有不良習慣 (如食煙酗酒) 或者家族有癌症病史，應聽從醫生建議定期追蹤身體健康情況。