年過50歲就會有飛蚊症？出現3大症狀馬上睇醫生！
50歲之後，眼球開始老化，加上現代人長時間睇電腦手機，種種原因加埋都會令到飛蚊症出現。大多數的飛蚊症都係良性，但如果出現異常情況，就要馬上睇醫生。
接近50歲眼球老化現飛蚊症
飛蚊症係指見到一堆浮游物 (多數係點狀或者線狀) 響眼入面漂浮。年過40歲接近50歲時，眼球入面的玻璃體就會好似肌肉咁萎縮，開始脫離視網膜，導致浮游物出現。依個老化現象係無可避免，亦無法導逆轉，根據統計，20到 29歲人士有 15%有依個問題，而70歲以上更高達超過 70%。
步入50歲之後好多人都會有飛蚊症，而本身有近視、做過白內障或激光矯視手術人士更加係高危人士。不過大部份飛蚊症都係良性，成因係玻璃體老化，所以唔使太過擔心。雖然注視淨色背景，例如睇書時，會比較困擾，但由於唔影響視力，通常唔使求醫治療，只需要持續觀察數量同埋形狀有無明顯改變就得。但係如果出現以下3個情況，就一定要盡快去睇醫生呀！
3大症狀必須立即求醫
1. 出現一下閃光，然後有大量飛蚊
閃光可能係視網膜被拉扯破洞所引致，必須盡早求醫。而就算無閃光，突然出現大量飛蚊有可能係視網膜剝落所造成，都應該馬上睇醫生。
2. 出現黑影
如果視野有一部分被黑影擋住，而個黑影係唔會移動的話，咁好有可能係視網膜剝落。
3. 視力模糊
視力突然變得好模糊，睇極都睇唔清，有機會係視網膜出血，千祈唔好忽視。但如果視力只係短暫對唔到焦，有機會係用眼過度令眼球肌肉僵硬，多數休息一陣就會改善。