中年身高變矮好平常？可能係骨質疏鬆症！比後生時矮超過3CM = 骨質密度響警號

年過50之後發覺自己愈來愈矮？中年身高變矮好有可能係代表你患上骨質疏鬆症！除了身高變矮之外，仲有機會造成骨折，影響身體活動能力。女性患上骨質疏鬆症的比率高過男性，所以要特別留意。

中年身高變矮

女性比男性較易有骨質疏鬆問題

骨質密度響30歲之後會慢慢流失，而女性響更年期之後，由於雌激素大減，停經後5年每年會流失3-5%的骨質密度，所以到50歲左右就可能少了25%的骨質密度。有調查發現，更年期後的香港女性多達35%患有骨質疏鬆症，而同一年齡層的男性亦有高達10%有依個問題。

骨質疏鬆症初期無任何徵狀，好多患者都係跌親導致骨折後，先發現自己的骨質密度已經嚴重流失。跌倒引致的骨折常見於：脊柱、手腕同股骨，大部份脊柱骨折都係無徵兆，患者甚至唔會覺得痛，只會發現身高不知不覺地愈來愈矮。

2011時曾有調查指出，香港有2成更年期後的婦女曾有脊柱骨折，而超過70歲的人士當中，更有近7成女性同2成男性患有骨質疏鬆引致的脊柱骨折。雖然隨住年紀增長，身高或多或少有點縮水，但如果中老年的身高比年輕時矮多過3CM，就好有可能係脊柱骨折，必須多加留意。

如何檢測骨質密度？

想知自己有無骨質疏鬆問題，可去有提供骨質密度檢查的診所或醫院，透過精密的雙能量X光吸收儀進行檢測，過程簡單快捷，十幾分鐘就可測出骨質密度。如發現骨質密度偏低，亦可透過口服或針劑藥物治療，以減慢骨質流失速度。日常生活多攝取鈣質、維他命D，同埋多做負重或撞擊運動，都可以減慢骨質疏鬆預防骨折。