父母離世後先明白　50、60歲仲有人讓你叫一聲「爸、媽」係福份　請珍惜同年長父母相處時光

每日接到爸媽的電話，響屋企 Whatsapp group 收到爸媽的語音訊息，返到老家可以叫一聲「爸、媽」……曾經係理所當然的小事，到 父母離世 後，先明白這些小事係咁珍貴。

父母離世 後　懷念過往相處的小事情

原來當有日再收唔到父母來電，無人問我「幾時返去食飯？」，再無Whatsapp錄音叫我們一家返去飲湯，先發現自己係咁想念這些以前覺得微不足道的時刻。想念爸爸媽媽的時候，唯有睇返以往的訊息紀錄，想聽他們聲音時就重播語音訊息，好在父母健在時幫他們拍過唔少短片，見到短片中的他們健健康康、笑得咁開心，感覺他們就在我身邊從未離開一樣。

有時真係好想搵爸媽時，就會send Whatsapp給他們，或者打電話給他們，雖然好傻，雖然另一頭唔會有回音，但對我來說都算係一個心靈慰藉，覺得同爸媽仲有一絲聯繫。

中年人叫「爸、媽」時仲有人回應係福份

去到50、60歲依個年紀，父母仍然健在，當你叫「爸、媽」時有人回應，真係一種莫大福份，好好珍惜同年邁父母相處的時光。雖然有時父母可能長氣了一點、囉唆了一點，但其實都係出於對仔女、孫兒的關愛，多多理解他們，盡力陪伴，將來父母百年歸老時，自己都唔會有咁多遺憾。

疫情關係，少了好多同爸爸媽媽出去玩的機會，甚至有些長輩住老人院，院舍以防疫為由謝絕家屬探訪，唔少樂齡人好耐都無親身見過爸爸媽媽，唯有多傾電話或視訊，盡量把握相處時間。雖然傾談的話題成日重覆，有時仲可能傾到沒話題，但只要父母仍然平安健在，就係樂齡人的幸福時刻。

相關閱讀：父母不在了，兄弟姐妹不再是「一家人」？