衣物斷捨離3大秘訣 控制衣服數量 買一件捨一件 營造舒適生活空間
踏入秋冬即將換季，蠢蠢欲動好想添置新衣物，但又怕一屋都係衫，令屋企愈來愈亂。其實斷捨離生活唔代表完全唔購物，但一定要買得精明同時要控制物品數量，睇睇以下3大衣物斷捨離秘訣，可以買到心頭好之餘，又唔會令物品不停增加，維持舒適的生活空間。
1. 買一件掉一件
想維持極簡生活，避免增加衣物數量，最好的方法係買一件掉一件，例如想買新的長褲，就將本身擁有的舊長褲丟掉或捐出，令到衣物數量不變。
2. 控制物品數量，清楚自己需要
衣物太多，多到有時忘記自己有咩衫褲鞋襪，甚至在大掃除時搵出好多從未著過的衣物？控制衣物數的好處係，令你清楚知道自己有哪些物品，明白自己需要甚麼、仲欠缺甚麼，內心感到滿足，減低衝動購物的機會。
3. 買真正鍾意的衣物
你有無試過因為減價而買下一些唔係太鍾意的衣服？本身諗住慳錢，但最後無乜點著過而變成嘥錢。斷捨離的其中一個秘訣就係降低數量但提升質量，必須買自真正鍾意的衣物，如此一來屋企物品少咗，但生活質素卻提高咗。