黑白造型｜日本50歲時尚網紅4大穿搭技巧 經典百搭黑白配 簡約優雅又有型
黑、白，兩種最基本常見嘅顏色，亦係最經典、永恆、百搭嘅顏色，只要好好挑選單品、花點心思配搭，黑白兩色都可以有好多變化，唔會重覆同沉悶之餘，更可顯出高級型格感，不如一齊跟以下依位50歲嘅日本網紅學習啦！
50歲嘅濱井經常響社交媒體上分享自己嘅日常穿搭，當中唔少係黑白雙色嘅造型。黑白兩色係非常經典嘅配色，無論咩身形同膚色都可以輕易駕馭，兩隻顏色對比強烈，令視覺上有一定嘅收窄效果，亦好容易塑造出有型又高級嘅感覺。
雖然黑白色造型容易駕馭，但想穿搭脫穎而出，就要留意一啲小細節，以下係4個濱井經常利用嘅穿搭技巧，好值得參考！
1. 著重衣服剪裁
無論係上衣、大褸、裙、褲，濱井都落足心機挑選有獨特剪裁嘅衣服。例如泡泡衫上衣、長版背心大褸、傘狀造型百褶裙等，為簡單嘅黑白造型增添唔少細節。
2. 拼湊各種質地
既然係顏色上無大變化，就要響材質方面落功夫。全身同一色調、同一材質的話，睇落去比較刻板沉悶，不妨配搭唔同質地嘅衣物，例如以針織、人造皮革、緞面等質地製造出層次感，亦可令整體造型更有質感。
3. 選擇有圖案嘅單品
由黑白兩色組成嘅各種圖案，格仔、條紋、碎花、潑墨等等，可以令視覺效果更豐富，亦能營造各種形像，例如格仔、條紋比較中性陽剛；小碎花有柔美感，大碎花則奔放隨性；潑墨圖案文藝又優雅。不妨隨住想散發嘅感覺來適合嘅圖案單品。
4. 運用配件
配件雖然只係小小一件，卻可以為整體造型變化，有畫龍點睛嘅效果。例如以下濱井全黑嘅造型，再適量地加上白色小配件，包括頸鏈、手袋、鞋，就令成個造型活潑起來。又例如以白色冷衫襯托出黑白間條頸巾，成為造型焦點。
