免費展覽｜龍虎山環境教育中心藝術 × 生態展《一樹無聲》：感知自然、思考生死
之前同大家分享過龍虎山環境教育中心，嗰度被樹林圍繞環境宜人，最近中心舉辦咗一個同樹木有關嘅藝術展，邀請8位本地藝術家展出其創作，而且費用全免。
展覽名為《一樹無聲》，結合藝術同生態，由8位本地藝術家以塌樹觸發靈感及創作，運用好奇心同想像力，透過7個藝術裝置同埋一本同步創作小說，嘗試探索「塌樹」背後嘅故事，分享佢哋嘅感知與體會。
主辦單位指香港係個高度人工化嘅城市，好容易忽視樹木嘅存在，只有當颱風塌樹，又或發生石牆樹遭砍伐等事件，樹木嘅生死先會引起公眾關注。然而，樹木嘅死亡並非終結，而係回歸自然循環。當樹木塌下，可以成材，作為建築及工具等原料，以另一個形式繼續陪伴我們嘅日常生活。生命週而復始，樹木倒下嘅意象，令人對生死產生更多思考。
今次展覽皆圍繞真實嘅塌樹而創作，以一棵塌樹嘅唔同部分為靈感，響龍虎山環境教育中心裡裡外外，重塑塌樹現場。藝術家透過多感官體驗（視覺、聽覺及嗅覺），以文字、繪畫、攝影、雕塑等融合歷史生態同藝術嘅多角度創作，探討「塌樹」同人嘅關係，經歷一段屬於樹木，也屬於個人生命的旅程。
龍虎山環境教育中心：全新藝術 × 生態企劃展《一樹無聲》
日期：即日起至2023年3月9日
開放時間：
星期二、四至日 － 上午10:30至下午5:30 (展廳下午1:30至2:00關閉進行消毒)
星期三 － 上午10:30至下午2:30
地址：龍虎山環境教育中心 (香港半山旭龢道50號，大學道入口附近）
費用：全免
網站：按此
查詢：2975 9031