東涌櫻花2023｜機場赤鱲角南路櫻花園 昂坪纜車下打卡賞花 (附詳細前往方法)
機場赤鱲角南路嘅櫻花盛開喇！除咗觀景山山腳下嘅櫻花樹外，今年仲有櫻花園，櫻花樹比舊年多，望過去一片粉紅色好夢幻，即刻睇前往方法啦！
櫻花園入面有幾十棵櫻花，仲有一條櫻花步道，可以一嘗櫻花樹下散步滋味。而附近嘅觀景山入口位置亦種有約10棵櫻花樹，整齊地排成一線，彷似一條櫻花大道，難怪近年每到依個季節都吸引咁多人去賞花打卡！
最近櫻花已經逐漸盛開，粉紅色中帶點桃紅，櫻花樹後方不時有昂坪360纜經過，無論係響櫻花園定觀景山入口，都可以一次過拍下櫻花和纜車同框嘅美景。
櫻花樹長得唔算高，可以近距離影相，輕鬆拍到花朵近照，想影櫻花嘅島友要把握時間！
東涌櫻花2023
地點：赤鱲角南路
前往方法：
1. 港鐵
東涌港鐵站向昂坪360纜車站方向前進，沿達東路花園繼續前行，上行人天橋到對面馬路，然後在迴旋處往右，走過赤鱲角南路後即可到達，全程約15至20分鐘。
2. 巴士
乘搭前往機場嘅E車，於機場燃料庫站落車後，朝車尾方向步行並過對面馬路，轉彎後即可到達。
(相片來源：香港國際機場Facebook)