彩色穿搭｜日本50歲時尚達人4大穿搭技巧 輕鬆駕馭色彩 提升氣色增加活力
之前同大家介紹過50歲嘅日本網紅濱井嘅黑白穿搭，其實佢平時除咗鍾意著黑白色外，都會以鮮色打扮示人，即使係蝦人著嘅彩藍色、粉紅色、鮮黃色，佢都可以輕鬆駕馭，提升氣色、有活力得來又唔會過份年輕，而家就同大家分享佢嘅彩色穿搭術！
以下係4個濱井經常利用嘅彩色穿搭技巧，有一啲之前已經介紹過，今次只不過換上彩色衫做例子，證明只要好好活用穿搭術，可以創出無窮變化。
4大彩色穿搭技巧
1. 全身一個重點
彩色衫本身就好搶眼，除非故意撞色，如果唔係的話，建議全身上下只有一件衣物係彩色，無論係上衣或褲子或連身裙都好，只有一件就足夠。
2. 善用基本顏色
基本顏色包括黑白、白色及中間色，中間色即係大地色系及灰色，以基本色配搭鮮色，可以取得平衡，有焦點得來又唔會太浮誇。
3. 整體唔超過3種顏色
穿搭時要留意全身唔好超過3種顏色，以免色彩過多令人眼花瞭亂。可以試試上衫一隻色、下身一隻色、鞋同埋袋一隻色，又或上身配件跟鞋子一樣顏色，有上下呼應效果，令造型具統一感。
4. 加添其他顏色作平衡
擔心單著鮮色上衫太過搶眼誇張，可以試試加上大頸巾或披肩，透過大面積地加入其他顏色來平衡整體感覺，黑色、灰色、啡色等都係易襯嘅顏色。
