老字號梁蘇記告別西九29年老店 3月即將遷往尖沙咀 繼續人手造遮&永久包修
梁蘇記於1885年響廣州創立，至今已經接近140年歷史，百多年來一直專注並堅持人手造傘，更以永久免費維修遮骨服務聞名。最近梁蘇記宣佈，屹立西九龍29年的門市即將告別，並遷往尖沙咀。 
開業初期，梁蘇記售賣一般黑色同藍色為主嘅長遮。梁蘇記遮響當時係身份地位嘅象徵，甚至連當舖都接受用梁蘇記遮作典當。到1940年代，縮骨遮面世後大受歡迎。去到90年代，梁蘇記除保留經典款式外，亦轉向使用一些較為輕便及可遮擋紫外線嘅物料，以迎合大眾需求。
梁蘇記推出嘅雨遮款式眾多，長遮、自動縮骨遮、拐杖手柄等，圖案方面亦好多元化，除咗經典格仔外，仲有油畫風、迷彩、碎花等等。加上可以永久免費維修遮骨，吸引唔少顧客青睞。
雖然梁蘇記曾於港島區有多間分店，但都於1986年結束業務。而位於西九龍中心的店鋪於1994年開業，係第一間設於商場嘅店舖，亦係目前唯一一間總店。不過走過29個年頭之後，梁蘇記宣佈將於今年3月告別西九，遷往尖沙咀彌敦道111-181號柏麗購物大道G36號舖 (確實日期稍後公佈)。梁蘇記於Facebook專頁指：「新門市繼續秉承『遮骨永久包修』，致力人手造遮，風雨同舟！」
梁蘇記遮廠
地址：深水埗西九龍中心6樓629號鋪
電話：2386-5629
營業時間：早上11:30至晚上8:00
新舖地址：尖沙咀彌敦道111-181號柏麗購物大道G36號舖 (確實開業日期稍後公佈)