「618上海街」戰前唐樓活化商場 懷舊雜貨店尋寶
經過旺角上海街同亞皆老街交界，有一整排三層高的騎樓式唐樓，充滿住舊香港的感覺。整排戰前唐樓活化成商場「618上海街」，入面有好多懷舊雜貨店，讓大家慢慢尋寶。
「618上海街」由14幢唐樓活化而成，其中4幢係建於60年代的戰後建築，而另外10幢就大有來頭，係20年代的戰前騎樓式唐樓，屬二級歷史建築，大家細個應該都見唔少依種「下舖上居」的騎樓式唐樓，結合了中國南方街舖屋同西方廊柱式建築特色，中西融合，係舊時香港商業街道的主要風貌。
大家去到「618上海街」一定要欣賞埋支撐住整排騎樓的13條麻石柱，柱上的廣告招牌充滿住歷史，將舊香港原汁原味呈現給大家。商場入面有一系列用旺角上海街歷史做主題的懷舊壁畫，邀請本地藝術家繪上舊日的涼茶舖、茶樓、茶餐廳、五金舖等等，鍾意打卡的唔好錯過。
來到商場當然要行街，商場大部份舖頭都係本地特色小店，賣懷舊物品為主，有古著店、復古懷舊文具、有舊香港特色的家品等等，大家可以去慢慢尋寶。行到肚餓仲可以揀間餐廳醫肚，除了有戶外用餐的天台餐廳和懷舊冰室外，仲有馬來西亞過江龍「蘇媽蘇媽馬拉茶室」，必點馬拉美食肉骨茶和咖央多士，在未能隨意去旅行的日子，嚐嚐異國美食，一解旅行癮。
618上海街
地址：旺角上海街618號
開放時間：每日上午10時至下午11時