【50歲時尚】專家建議6大穿搭重點　教你揀T恤長褲　唔靠鬆身衫都可以修飾身形

50歲過後，身型開始起了變化，肚腩慢慢明顯、手臂出現bye bye肉、肌肉下墜，好多人為求遮掩身形從此只著鬆身衫。不過日本樂齡時裝品牌Permanent Age創辦人林多佳子就唔係咁睇，佢認為著衫最緊要啱自己身形，跟住她的6大建議，一齊巧妙修飾身形吧！

1. 鬆身唔一定顯瘦　適度合身反而更俐落有型

唔少人都認為著鬆身衫可以遮住身形缺點，但林多佳子就話，太過寬鬆的衣服會令人睇落變得更肥，而且長期著鬆身衫，可能會令人不自覺身形的變化，導致對身形的要求愈來愈放鬆。

她建議大家選擇啱身的衣服，唔會太鬆、亦唔會太緊，合適的修身剪裁，睇落更乾淨俐落有精神。至於點先為之啱身呢？林多佳子認為衣服著上身後，令身體曲線自然好看的，就係適合的尺寸，她亦鼓勵大家可以試試將不同鬆緊程度的衣服混搭，可以令穿搭有更多變化同層次。

2. 上衣肩線最好比膊頭窄

以T恤為例，林多佳子建議選擇肩線比膊頭略窄的款式，即係穿上衣服後，肩線應該位於膊頭偏內側的地方。另外，亦要注意衫袖的寬度，避免太窄箍住手臂的款式。如果揀啱尺寸，即使一件普通的T恤，都會變得好睇。

3. 上衣領口要慎選

領口的形狀亦要講究，配合唔同體型同頭型而挑選合適的領口。頸短和粗的，宜選擇衣領較深的Ｕ形領款式；若是鎖骨較瘦的話，宜選擇衣領較淺的Ｃ形領。

4. 上衣長度宜微微蓋住臀部

上衣長度最好可以遮住一半臀部，會有效修飾小腹同臀部。

5. 揀褲時留意臀部係咪合身

揀選褲子時，要以以臀部係咪合身為標準，因為如果臀部尺寸合身，但腰圍寬鬆，可以用皮帶解決，但如果臀部唔合身的話，即係褲子的版型未必適合你的身形。

6. 褲子長度不宜過長

過長的褲子會給人累贅的感覺，建議選擇可以露出腳背的長度，睇落會比較清爽同埋有時尚感。

相關閱讀：50歲以後的樂齡衣著 沉穩淡雅的黑白藍