【50歲髮型】女性年過50歲後，鍾意剪短頭髮？主要因為依3個原因！
年過50歲的女明星當中，好多都係留中短長度的髮型，就好似近期討論度好高的江美儀、劉嘉玲、吳君如等。究竟點解中年女性多數留中短髮呢？美國專欄作家Sabine Reichel就探討了依個有趣的現象。
Reichel指出，社會彷彿認為女性去到一定的年紀、社會地位同職位時，就應該剪一個乾爽俐落的短髮，先可以襯得起年齡同身份。甚至當年過50歲，頭髮開始變成灰白色時，如果仲留長頭髮的話，可能會常常被問頭髮太長了，會唔會打算剪短呢？
Reichel舉例全球多名女性政治家，如希拉莉、默克爾，甚至以前的戴卓爾夫人，都係一頭梳理整齊的短髮，睇落去十分幹練、朝氣勃勃，給人一種「因為公務繁忙而無時間打理長頭髮」的專業感覺。這樣一想，即使在香港，唔少女性政治家或企業家，甚至連香港第一位女性特首林鄭月娥都係留短頭髮的。
一般年過50歲的女性剪短頭髮的原因，就沒有政治人物想得那麼樣複雜，大多數都係考慮到實際生活所需，例如認為短髮方便易打理，可節省洗頭吹頭的時間；有部份女性覺得更年期後髮量變少，留長髮感覺稀疏，所以剪短頭髮希望睇落更精神。
有些中年女性即使唔抗拒留長頭髮，不過就認為有需要將長髮紮起或盤成髻，免得其他人從背後睇會以為自己係後生女，見到正面先發現誤會了就太過尷尬。似乎在某些中年女性心目中，長頭髮始終是年輕女性的標誌。
中年女性就要剪短髮可能已經係一件約定俗成的事情，不過Reichel鼓勵大家，應該自由決定自己鍾意的髮型，不被社會的刻板印象綑綁，無論係留長髮定剪短髮，都由自己話事，展現最真實的自我。