下流上車族｜劇中兒子全家移民 鮑起靜被獨留在港 3段獨白演繹父母複雜心情 催淚引共鳴
熱播中的劇集《下流上車族》，其中一幕講述鮑起靜 (鮑姐) 的兒子一家移居到日本，剩下她獨自留港，面對如此情況，鮑姐3段獨白錄音表達為人父母的複雜心情，引發共鳴。
73歲的鮑姐在劇中飾演謝毓霞一角，劇中兒子閔家寶 (林景程飾演) 一家三口移居日本，留她一人在香港。鮑姐一直以為兒子將來會接她到日本一齊生活，但點知有日收到兒子傳來的語音訊息，對她說：「留響香港幾好吖！我一得閒就會返嚟探你！」
孤單的鮑姐頓感憤怒，生氣大罵：「我係你阿媽嚟架！阿媽而家唔及老婆親係咪呀？吓？你揼低我就去移民係咪呀？你唔理我喇，我養到你咁大！」
不過送出錄音後，鮑姐馬上覺得自己太惡，於是刪除錄音，然後狀甚輕鬆地說：「家寶呀，我而家學緊日文，我同次郎一樣學緊食日本菜，隨時都可以移民去日本喇，係呀！哈哈！不過日本嘅五十音太難，我學極都學唔識，不過唔緊要啦，我去到日本唔出街，唔同人講嘢，咁得喇啩？」
但依次鮑姐都係刪除錄音，決定講出內心真正法，語帶哽咽地講：「家寶呀，我同肉絲米 (劇中新抱名字) 生活習慣唔係幾同，所以有少少拗撬啫係咪？你哋就帶住個孫去日本…… 家寶呀，阿媽兩個老公都走咗喇，咁我淨係得返你，你係咪都唔想要我喇？係咪吖？」
響新一波移民潮下，確實唔少長輩獨自留港，只能夠透過視像通訊同仔女孫兒保持聯繫，日常生活難免感到孤單寂寞，鮑姐依3段錄音表達了為人父母的複雜情緒，難怪唔少網民都大讚鮑姐演技能夠引起共鳴。