退休心情：覺得空虛係咪正常？點樣面對孤單感？
講到退休心情，你係咪偶爾就會覺得孤單空虛，好似失去人生意義咁？《孤獨管理》作者王浩一認為退休係人生的第三次出生，依一次的人生課題係學習點樣接受孤獨。
退休後空虛感無可避免
王浩一認為退休後的空虛失落係避免唔到的，大家能夠做的就只有提前準備，做好心理建設，迎接退休（又或是被迫提早退休）那天。
他響書入面提到自己外父，細細個就要去工廠返工，幫忙分擔家計，到結婚生仔後，就事事以孩子為優先，直到退休前都係埋頭工作賺錢養家，從來未真正諗過自己的興趣同專長。70歲那年，外父在工作崗位退下來，因為每日都無所事事而頓感失落迷茫，仔女提議他去公園散步，但他就只係坐公園發呆，對周圍事物完全無興趣。王浩一認為外父大半世都努力賺錢，響以前困苦的年代，賺錢就係最開心的事，但當退休後喪失了賺錢能力，成個人生失去方向，做咩都覺得乾枯乏味。
抱「繼續學習」心態 勇敢面對孤單
的確好多人認為退休等於失去社會地位，想到退休就唉聲嘆氣。王浩一鼓勵樂齡退休朋友要抱持堅強、主動「繼續學習」的心態，努力發掘世界的美好、加深自我認識、繼續廣交朋友，響依個過程中會獲得自信同智慧，有了這些生命的養分，自然能夠勇敢面對孤獨，慢慢搵到方向，再無任何事難到自己。
王浩一笑指自己係個「好動中年」，仍然充滿好奇心同活力，好學不倦，對深度旅遊同歷史有濃厚興趣，生活充實得來有義意。抱著熱情去過每一日、認真去做每一件事，無論幾歲人生都一樣可以好豐盛。
相關閱讀：過來人分享退休後心路歷程——好似坐過山車