過來人分享退休後心路歷程——好似坐過山車
唔經唔覺退休已經接近一年，依年的心路歷程尤好似坐過山車。退休前滿心歡喜期待，退休初期無比快樂，但去到中段開始失落徬徨，直到最近重新調整心情再出發，用了差不多一年時間，終於搞清楚，原來退休是這樣的！
仲記得退休前日日約唔同同事食飯，同大家傾起預想中的退休生活時，大家都羡慕不已，令我更加期待退休。在公司的最後一天，同事仲幫我搞了場歡送會，公司送了「榮休禮物」給我，就這樣展開了退休生活。
返了幾十年工，突然不用天天準時起身出門口返工，話唔開心就假，退休初期日日瞓到自然醒，參加唔同活動，行山打波興趣班，認識了好多新朋友，得閒又約下舊同事食飯，生活多姿多彩，日日都過得好開心。不過原來退休就好似拍拖，一樣有蜜月期，開心快樂過後，開始有點失落同徬徨，未來十幾二十年的退休生活一直要這樣過？
令我覺得失落徬徨的主要原因，應該係覺得自己重要性、影響力慢慢減低，好似同舊同事食飯，大家會傾下公司最近事情，我會搭唔到嘴；同新識的朋友又未能深交，只能夠閒話家常；而家人又各有各忙，未必有時間關心我。種種加起來就令我懷疑自己價值，覺得自己所擁有的都只在過去裡，而家就係空白一片同時代脫節，對未來更加不敢想像。因為情緒太過低落，最嚴重那時仲試過失眠。
不過好在身邊有班差不多時間退休的朋友，大家一齊傾下開解下。老實講，過了30、40年規律生活，突然間唔使工，好容易失去生活重心同目標，再變成自我懷疑。後來我諗通了，決定要繼續學習成長，專注培養一種興趣 ，這樣決定後我覺得充滿動力，生活豐富了很多，亦覺得自己與時並進，再唔係空白一片。有空閒時我又走去做義工，回饋社會，有感生命更有意義。
如果可以重來一次，退休前除了諗定去邊度玩，我會做個更長遠規劃，回顧整理返過往幾十年人生，然後諗清楚未來方向，向住目標進發。退休係人生一個重要轉捩點，人生去到某個階段，係停滯不前定勇往直前，一切都睇自己點決定。經歷過坐過山車般的心路歷程，而家我會形容自己玩緊風帆，乘風破浪找尋理想中的退休人生。