楚原逝世一周年｜電影資料館放映13部電影 回味一代導演經典作品 滿60歲半價購票
為紀念著名導演兼演員楚原逝世一周年，香港電影資料館精選咗13部楚原嘅代表作，響2月至3月於資料館電影院放映，60歲或以上仲有半價優惠，即刻睇購票詳情！
楚原嘅作品題材多元豐富，涉獵唔同範疇，拍攝手法亦獨樹一幟。佢執導嘅電影唔少係文藝同愛情片，例如以年輕人愛情故事為背景嘅《含淚的玫瑰》（1963）、充滿歐陸電影風格嘅《冬戀》（1968）、以失憶同心理分析為題嘅《我愛紫羅蘭》（1966），同埋荒誕搞怪嘅愛情喜劇《玉女添丁》（1968）。
1970年開始，楚原更涉足武俠電影，以「楚原式」唯美浪漫手法開啟咗改編古龍小說嘅熱潮，成就多部叫好叫座嘅作品，如《流星．蝴蝶．劍》（1976）及《天涯．明月．刀》（1976）等，與李翰祥、胡金銓及張徹並列為「邵氏四大導演」。
佢執導嘅電影超過120部，亦曾參與電影同電視劇幕前演出。對電影圈貢獻良多嘅楚原，先後響1998年及2018年分別獲頒香港電影金像獎「專業精神獎」（第17屆）及「終身成就獎」（第37屆）殊榮。
今次放映節目係電影資料館首次同香港電影導演會合辦，名為「玫瑰．蝴蝶．紅葉——再探楚原的秘密花園」，一共精選咗13部電影，包括：《湖畔草》、《可憐天下父母心》、《冬戀》、《含淚的玫瑰》、《黑玫瑰》、《我愛紫羅蘭》、《玉女添丁》、《大丈夫日記》、《愛奴》、《七十二家房客》、《龍沐香》、《火併》、《流星 • 蝴蝶 • 劍》。
所有放映均設映後談，由導演會成員，包括張婉婷、彭秀慧、關錦鵬、黃進、翁子光、舒琪、馬偉豪、鄭丹瑞、許鞍華、泰迪羅賓、王晶和畢國智擔任講者，文雋、何思穎以及喬奕思擔任主持。映後談以粵語主講，免費入場。
玫瑰．蝴蝶．紅葉——再探楚原的秘密花園
日期：2023年2月18日至3月4日
放映時間表：按此
地點：香港電影資料館電影院 (香港西灣河鯉景道50號)
票價：$45；60歲或以上人士、殘疾人士及一名同行照料者及綜合社會保障援助人士半價
購票：現於城市售票網發售，電話購票請致電3166 1288
售票詳情：按此
節目查詢：2739 2139