樂齡想當年：舊時過年最有氣氛 無餐廳開 放炮仗 睇賀歲波
舊時過農曆新年，餐廳舖頭唔會開，細個那時有得放炮仗，去到80年代同成班親戚朋友睇賀歲波，熱熱鬧鬧，諗起都開心！
而家的餐廳舖頭好多都一年365日全天侯營業，即使年初一都唔放假，比起以前過年真係好唔同。舊時年初一至年初三幾乎無舖頭會開，就算有開都可能會加收三倍服務費，所以要一早預備好餸菜，送禮禮盒都要提先買好。那幾天條街係超級冷清，大家都聚在家裡與親朋好友一齊過年。
以前仲係細蚊仔，香港仲未禁放煙花，每逢新年幾個細路拎住砂炮周圍掟，鬧掟得遠掟得大聲。不過砂炮威力細，只屬於入門版本，進階版係滴滴金，而家比較多人叫佢做仙女棒，再厲害點就放龍吐珠，煙花可以射到上天，超刺激！有些地方仲會燒炮仗，正所謂「爆竹一聲除舊歲」，燒過炮仗先係真正送舊迎新。不過1967年之後，政府就立例禁止入口同燃放煙花爆竹，雖然大家仲會偷偷玩，但就無以前玩得那麼盡興。
後來去到80年代初就改成睇香港賀歲煙花匯演，1982年第一次匯演時都算係城中大事，仔女出世之後都有帶他們去現場睇感受一下熱鬧氣氛，後來仔女都大，就睇電視台轉播算了。
仲有80年代大家仲鍾意睇電視，唔似得而家最愛用手機，當年同朋友過年係會圍在電視前睇「賀歲波」，最記得如果電器舖有開的話，大家好鍾意站在電視牆前一齊睇一齊嗌，這樣過新年真係好有氣氛！