fbpx Web Interstitial Ad Example

樂齡想當年:有無人都係留產所出生?而家仲有無留產所? 

而家個個都去醫院生B,但想當年邊有咁多醫生?我們一眾50、60後多數在留產所出生,由「執媽」接生。不過隨住醫療系統愈來愈完善,留產所日漸式微,我們而家想搵返出生地都難了。

50、60年代興盛 80年代消失

相信樂齡朋友對「留產所」依個詞唔陌生,但大家又知唔知點解當年阿媽唔去醫院生,而要去留產所呢?原來60年代之前,醫院好缺產床同婦產科醫生,加上舊時醫生多數係男人,孕婦唔係好接受到由男醫生接生,所以就出現了留產所,以取代醫院產房角色。留產所有分公立同私立,無醫生駐場,但會有政府註冊的助產士 (當年係叫執媽或者大姑),如果有緊急情況,都可以急call醫院產科急救隊,點都安全過在屋企生。

50、60年代出生率高,留產所多到一街都係,有些出名的大姑更加係留產所的「生招牌」。不過去到80年代,出生率下降加上醫療系統進步,婦女轉去醫院分娩,留產所就慢慢被淘汰,最後絕跡香港。

而家想搵一間留產所都唔容易,有樂齡朋友曾經根據出世紙上的留產所地址去尋根,可惜早已倒閉變成魚蛋檔。而位於紅磡觀音廟旁的紅磡診所,前身就係留產所,建於1959年,不過在80年代已改成普通門診診所,延用至今。

相關閱讀:真係犀飛利!70年代潮語你而家仲有冇講?