【湯水食譜】日月魚節瓜淮山瘦肉湯　健脾明目、補腎益肝、清暑解毒

行街市買餸時，相熟菜檔姨張極力向我推介大大粒嘅節瓜，俾佢講講下又想飲節瓜湯，就係咁就買兩大粒肥嘟嘟嘅節瓜，再加一個紅蘿蔔嚟煲日月魚湯。

點解又係日月魚？因為小小豬鐘意飲之餘，最重要係對眼睛好，四眼豬係要多啲補下對眼仔，我要好努力監察同防止佢近視加深嘛！

日月魚可有醫治眼疾、明目、補腎益肝、養顏美髮功用，含有豐富蛋白質、磷、鐵、碘及鈣質，所以對調節人體代謝平衡及促進生長都有一定幫助；元貝含豐富蛋白質和少量碘質，滋陰補血及益氣健脾；淮山健脾開胃，其他好處為治療久泄久痢、肺氣虛燥、及消渴尿頻等症；節瓜具有清熱、清暑、解毒、利尿及消腫等功效；紅蘿蔔有健脾助消化、潤燥明目；蜜棗止咳潤肺、化痰平喘功效。(網上資料)

材料：

日月魚…… 一両
小元貝…… 一両
淮山……… 一両
節瓜……… 兩個
紅蘿蔔…… 一條
蜜棗……… 兩粒
瘦肉……… 約$40

做法：

1. 日月魚及小元貝洗淨後浸至軟身。

2. 淮山及蜜棗浸洗一陣。

3. 節瓜刮去外皮後切件。

4. 紅蘿蔔去皮以滾筒式切塊。

5. 瘦肉洗淨汆水。

6. 煲內放約3L水，待水滾後加入所有材料。

7. 再次滾起後，就用大火加蓋煲約15分鐘。

8. 再轉慢火加蓋煲多2小時。