出街食飯健康指南｜8大精明點菜貼士 避開幾類食物 外出用餐更健康
年尾年頭咁多慶祝活動，大時大節經常出街食飯，如果次次都食高熱量丶高脂肪或高鹽分嘅菜式，好可能會引致體重上升或影響健康。以下分享幾個外出食飯嘅點菜小貼士，只要識得精明嗌餸，外出用餐都可以健康。
1. 避免眼闊肚窄
點菜之前，先評估一下大家能進食嘅份量，避免眼闊肚窄，嗌得太多餸菜。每間餐廳供應嘅份量都唔樣，有啲餐廳嘅餸菜可能比較大份，點菜之前不妨先向侍應了解。
2. 參與點菜過程
同親朋好友去餐廳或酒樓食飯時，不妨多參與點菜嘅過程，建議大家點比較健康嘅菜式，遇到一啲未見過嘅菜式時，向侍應了解所採用嘅材料或烹調方法，以便更易作出選擇。
3. 盡量揀低脂肉類或豆類製品
多選擇含低脂肪嘅瘦肉丶魚丶去皮雞肉丶豆腐等。盡量避免含高脂肪，尤其含高飽和脂肪嘅肉類，例如腩肉丶午餐肉丶腸仔丶雞腳等，或經油炸嘅豆類製品如豆卜等。
4. 多揀含高纖維素嘅食物
多選擇含高纖維素嘅食物，例如全穀麥丶乾豆丶蔬菜丶水果、冬菇丶雲耳丶甘筍等。
5. 少嗌含高鹽分嘅食物丶配菜或調味料
經醃製嘅肉類同配菜，例如臘味丶鹹魚丶鹹蛋丶榨菜丶雪菜丶梅菜等都應該避免。另外，以高鹽分調味料烹調嘅菜式都不宜多吃，例如椒鹽鮮魷丶豉椒排骨等；多選擇以薑丶蔥丶蒜丶洋蔥等天然調味料烹調嘅食物。
6. 選擇以少油烹調法煮成嘅食物
少油烹調法包括蒸丶灼丶上湯煮丶焗丶烤丶清燉等，用較少油烹調嘅菜式有湯粉麵丶灼菜丶灼蝦、清蒸鮮魚丶白切雞等。盡量避免炸丶紅燒等以多油烹調法煮成嘅食物，例如炸子雞丶炸蝦球、紅燒排骨等。
7. 避免太多醬汁嘅菜式
宜減少食用含高脂肪嘅醬汁，例如椰汁丶白汁丶咖喱汁丶沙律醬等。如果嗌了含有好多醬汁嘅菜式，進食前宜撇走多餘嘅醬汁，唔好以餸汁拌飯。
8. 甜品丶飲品不宜多
一般嘅甜品都係高糖分、高熱量 ，只宜淺嘗，不妨多食新鮮水果作為甜品。飲品方面，可以揀清茶丶清水或少量純果汁，代替汽水丶啤酒丶加糖果汁等含高糖分、高熱量飲品。