fbpx Web Interstitial Ad Example

【湯水食譜】牛大力土伏苓粉葛豬骨湯 清熱祛濕解毒 濕疹人士啱飲

依排天氣都總係帶點點潮濕,依啲天氣又真係好容易令人皮膚搔癢,而且又會成日都好似易倦兼腰痠背痛,所以今日去街市買材料煲時,店主就介紹我煲依個牛大力土伏苓粉葛豬骨湯啦!

其實一聽到個名就好似好複雜,我初頭都有啲抗拒,打算簡單買個紅菜頭嚟煲就算。不過店主又好詳細咁同我介紹,一聽到話可以祛濕解毒,好啱濕疹人士飲,我已經有一半興趣。再聽埋話佢會幫我切好晒,返屋企只係沖洗一下就煲得,所以就請店主幫我執一份材料試下煲啦!

牛大力土伏苓粉葛豬骨湯

材料:

牛大力………… 4兩
土伏苓………… 4兩
粉葛…………… 1件
赤小豆、扁豆… 約1兩
豬尾骨………… $50
陳皮…………… 一角
蜜棗…………… 4粒

牛大力土伏苓粉葛豬骨湯-材料

雖然店主講到好厲害,不過第一次煲都要上網睇下啲資料,睇下3樣主角係乜東東嘛!

牛大力 – 補虛潤肺,強筋活絡,治療腰肌勞損、風濕關節炎

牛大力土伏苓粉葛豬骨湯-牛大力

土茯苓 – 除濕解毒,通利關節,治療皮膚痕癢

牛大力土伏苓粉葛豬骨湯-土伏苓

粉葛 – 解熱退燒,降低血糖,透疹止瀉,治療熬夜頸背筋骨酸痛

牛大力土伏苓粉葛豬骨湯-粉葛

做法:

1. 牛大力、土伏苓及粉葛由於已經切好晒,所以用水沖洗幾次就得 (真係好方便哦);蜜棗、赤小豆及扁豆浸洗一陣;果皮浸軟刮囊;豬骨汆水。

牛大力土伏苓粉葛豬骨湯-做法

2. 煲內加入約4L水,然後加入果皮。

牛大力土伏苓粉葛豬骨湯-水量

3. 待水滾後加入所有材料。

牛大力土伏苓粉葛豬骨湯-袪濕

4. 繼續用大火加蓋煲約30分鐘。

牛大力土伏苓粉葛豬骨湯-大火

5. 之後轉慢火加蓋煲多2小時。

牛大力土伏苓粉葛豬骨湯-慢火

6. 最後加鹽調味,就飲得啦。

牛大力土伏苓粉葛豬骨湯-調味

小小豬一見到碗湯佢就有點抗拒,依一點我一早就估到,因為佢一向都唔鐘意飲烏卒卒顏色嘅湯,不過可以祛濕解毒兼對濕疹好,所以小小豬都係半推半就飲左大半碗啦!

其實味道又唔係好差,只係我比較少煲依啲山草藥湯唔多習慣,同埋豆味重左啲啲所以小小豬唔鐘意飲味道,我同老公都覺得唔錯,同埋間中解下身體嘅毒,人都健康啲呀!

溫馨提示:

由於個人體質都有所不同,我啱飲時又未必每個人都啱,所以大家記得煲之前了解下自己,或者問下相熟中醫/藥材店職員,呢個湯料啱唔啱自己呀!

(文章獲 小小豬Kinsey 授權轉載)

相關閱讀:5款 春天祛濕素湯 清熱開胃趕走疲勞!老黃瓜、合掌瓜、土茯苓 唔落肉一樣好飲