90歲人生觀｜日本93歲婆婆堅持每日化妝扮靚：睇落有精神，令我活得更有動力
現代人愈來愈長壽，香港人甚至係全球最長壽嘅地區之一，隨時活到90歲都不是夢。如果真係有咁長命，你有無諗過要點過呢？不如睇下依位93歲嘅日本婆婆安田美知嘅例子，可能你會得到啟發。
安田美知係響女兒嘅鼓勵下開始打扮，並從中搵到樂趣。佢88歲時著住YSL大褸搭配帽子影相，相片獲時尚雜誌睇中並刊登，刊出後得到熱烈反應，安田婆婆響女兒嘅協助下開始經營社交媒體，將自己嘅日常打扮同各位網友分享。
雖然已屆93歲高齡，不過佢仍然充滿活力，每日都將自己打扮得漂漂亮亮。即使只係去超級市場購物，安田婆婆都唔會鬆懈，由粉底到唇膏認真畫全妝，衣服、手袋、配件都經過精心配搭，帽同太陽眼鏡更加係佢不可或缺嘅配件。佢認為化妝扮靚令自己睇落更有精神，亦令佢更加有動力同熱情，並更欣賞自己嘅美。
93歲安田美知3大生活態度
– 唔累積壓力
– 唔同人比較，自然感到幸福
– 隨遇而安
就快活咗一個世紀，安田婆婆無懼歲月流逝，無論發生咩事，只要看待成「宇宙的法則」，就可以用悠然自得嘅態度過活。佢每朝都會以味噌湯做早餐展開新嘅一日，因為可以令身體變暖、朝氣十足；而到咗夜晚，佢會將當日發生過嘅事紀錄落嚟，以回顧結束一天。