60歲決心過極簡生活 日本單身blogger:物質減少,但心靈豐富

成日都想過極簡生活,但硬係的唔起決心丟掉舊物?日本樂齡單身blogger Chocolat,60歲那年望住滿屋雜物,突然覺得不如趁住有氣有力都係執一執啦,就展開了長達兩年的執屋過程!

不想增加兒子煩惱決心執屋

今年64歲的Chocolat ,不時寫blog分享自己「老前整理」的心得,每個月吸引高達60萬人次觀看。究竟係咩驅使Chocolat 丟掉滿屋雜物,成個執屋過程又係點?睇落去就知道!

Chocolat 47歲時同前夫離婚,然後買了一間400幾呎一房一廳的單身公寓,至今已經過了差不多20年獨居生活。剛搬到新屋時,她的家當就只有一張櫈、3箱衫,同埋幾件隨身必要物品。不過原本就鍾意家居雜貨同買衫的她,有了自己居所後,不知不覺愈買愈多。直到60歲時,她望住滿屋雜物、大型傢俬,心入面勁惆悵:「如果我第時老了無力,或者唔好彩有咩意外,就要麻煩兩個仔幫我清理依堆雜物。」為了唔想增添兩個仔將來的困擾,她決定趁仲有氣有力未真正變老時,自己親手整理。

用兩年達到極簡生活

她先從最佔空間的大型傢俬開始,丟掉太過大張的櫈、五桶櫃,雪櫃換成小家庭使用的尺寸,只留必須的傢俬。當處理好那些她一人無法搬動的大型傢俬後,她就開始整理衫褲鞋襪、餐具廚具。Chocolat首先淘汰以前返工要著的西裝,同埋後生時買落但而家已經唔適合的衫,再慢慢揀出自己鍾意又著得舒服、之後都會繼續著的衫。至於那些唔捨得掉的貴價衫,又或者覺得將來可能會再著的衫,她就先放入喼裡面作為「保留區」,每年打開檢查2、3次,如果根本唔記得件衫的存在,就會直接掉,但如果都仲係唔捨得,就會繼續放「保留區」。

Chocolat總共用了兩年去整理屋企,最後達到極簡生活,而家屋企只有唔到10件傢俬,同埋60件衫左右,所有物品都係她真正需要而且鍾意,她認為減少擁有非必要的物品,心靈反而更豐足,「執完間屋之後,好似重新認識了物品對自己的價值,而家會更加珍惜留下來的東西。即使生活簡單,同樣可以感到豐富充實。」

無論你係50歲又好60歲又好,年齡絕對唔係阻礙你執屋的藉口,試下向Chocolat學習,的起心肝丟掉不必要的雜物,可能你會發現另一種滿足!

相關閱讀:50歲以後過極簡生活!想自在幸福富有?試試斷捨離吧!