強制檢測下新行業 代排隊服務每個鐘$160 退休人士敢唔敢入行？
強檢下網上出現最新行業，響二手拍賣平台Carousell湧現唔少「代排隊服務」，每個鐘要價$90至$160不等，各位退休人士有無考慮加入做「強檢排隊師」呢？
圖片來源：大埔人大埔谷
二手拍賣平台現「強制檢測 代排隊」服務
疫情持續，好多人都需要做強制檢測，各區檢測中心大排長龍，動輒需要排幾個鐘。一向轉數快的香港人馬上諗到新商機——強檢代排隊，二手拍賣平台Carousell上就有唔少post係提供代排隊服務，收費每個鐘$90至$160，更有帖文註明至少兩個鐘起跳，唔夠一個鐘亦當一個鐘計，仲寫明服務態度誠懇。另一帖文指到2月13號前已經full booking，服務似乎好搶手。
有網民認為強檢代排隊係「發達大計」，但都有人覺得係「辛苦錢」，而且「攞命搏」。另外，有些網民質疑代排隊做法有問題，但又有另一批網民覺得只要係一換一，唔係打尖就無問題。
平台正移除相關服務
網民間對強檢代排隊服務意見不一，不過Carousell就覺得唔多妥，雖然排隊服務無違反平台社群守則，不過就唔接受任何人響疫情嚴峻之時，用依種方式牟利，或者令有需要人士享用唔到資源。所以Carousell決定介入，目前正採取行動，將相關商品或服務移除。
大家點睇呢？如果仲有強檢代排隊服務的話，大家會唔會為了唔使排幾個鐘，而付幾百蚊代排隊費用呢？
各位已退休人士，又願唔願意冒住中招風險，賺取幾百蚊代排隊費呢？
分享給身邊朋友一齊討論下！