政府唔排除實施禁足令 封城要買咩？樂齡人必備4大物品 有長期病要食藥必須留意！
新冠肺炎確診數字每日上升，食物及衞生局長陳肇始今早(28號)響電台節目中表示，政府唔排除實施「禁足令」。無論會唔會禁足都好，大家不妨做好準備，計劃定 封城要買咩，以防不時之需。
封城要買咩 樂齡人必備4大物品
1. 藥物
前排好多市民都去搶購必理痛，其實除了必理痛這牌子之外，大家可以去配 paracetamol 500mg 的藥物，成分跟必理痛一樣。如果有慢性病需要長期食藥的樂齡人，特別要留意自己手上的藥物仲有幾多，如果因為疫情嚴重唔想到醫院覆診或拎藥的話，可搵返覆診紙上相關醫院 / 診所 / 服務單位的電話號碼致電查詢，職員會因應實際情況作出安排。
另外，香港藥學服務基金早前宣佈擴大「送藥到戶」及社區支援服務，將覆蓋有病例的院舍、在隔離設施的患者，同埋響醫管局普通科或專科門診覆診的病人，有義工會到醫管局門診代領藥物，再有車隊上門送藥。有關服務預計維持10周至5月7日，如果想了解詳情，可致電60702177 (星期一至日、上午9時至晚上9時) 或 WhatsApp 94866126。
2. 防疫三寶
口罩、酒精、體溫計，相信唔少人屋企都長期備有足夠數量，如果自己或同住家人不幸染疫，響屋企都要戴上口罩，做好衛生防護，減低傳染機會。另外，亦有人會準備血氧儀，以防染疫後可時刻監察自己身體情況。
3. 食品類
儲糧可以減少外出次數，減低染疫風險。最好買一些可長期保存又有營養的食物，例如冷凍蔬菜、吞拿魚罐頭、乾貨 (如乾冬菇、木耳等)；購買肉類後可放在冰格，延長食用期限；零食方面可以揀堅果、蒟蒻同海苔，對樂齡人來說比較健康。
不過估計禁足期間，大家仍可以外出購買必須品，所以適量就好，唔使過份搶購。
4. 日常用品
廁紙、沖涼液、身體lotion等消耗性生活用品亦要準備好，不過唔使大量囤貨，適量準備就得。
如果感染新冠肺炎，在家等候衞生署安排而無法外出添購物資的話，可致電熱線1833019，由政府為無法自行安排日常生活所需的患者提供基本物資。