樂齢穿搭技巧！5大揀衫原則 & 襯衫重點 剪裁簡約、淺色系衣服 營造優雅大方感覺
只要掌握樂齡穿搭技巧，無論幾多歲都可以穿出優雅氣質。60歲過後揀衫必須多下功夫，衣服要符合年紀得來，又時尚有氣質，以下3個揀衫原則同2大穿搭重點，或者幫到你！
樂齡3大揀衫原則
1. 衣服設計要簡約
太過花佻華麗的衣服未必人人可以應付，如果自問唔係時尚達人，只想穩陣地穿出時尚優雅的感覺，建議避免剪裁複雜的衣服，選擇簡單、經典的款式，例如T恤、恤衫、九分西裝褲、闊腳褲等等，簡約舒適又大方得體。
2. 宜揀淺色系
深色系的衣服容易令人面色暗沉，如果平時比較少化妝的話，可以多選擇淺色系，例如白色、米色、淺卡其色、淺粉紅色等等，可以增加皮膚光澤，令人睇落更有活力之餘，亦散發柔和的氣質。
3. 注意下身長度
無論係褲定係裙，都要注意長度，避免過短，但都唔好太長，理想長度係膝頭以下、腳眼以上，重點係要露出腳眼以下的地方，有助修飾雙腳，令到對腳睇落更修長。
2大穿搭重點
1. 不要將過多圖案著上身
如果選擇著有圖案或花紋的衣服，因為花紋的色彩較豐富，已經係視覺焦點，其他衣服應該盡量揀素色，亦避免過多的配飾，避免視覺上過於混亂。
2. 鬆緊混搭創造層次
利用衣服的不同鬆緊度來創造層次，同時修飾身形。
「上鬆下緊」係最容易隱藏身形缺點的穿搭方法，揀一件寬鬆的上衣，長度最好遮蓋臀部一半，下身配襯合身的九分褲，簡單俐落好看。
另一種穿搭方法係「上緊下鬆」，貼身的上衣配搭鬆身的高腰褲，有拉長雙腳的效果，不過揀鬆身褲時一定要注意臀部係咪合身，唔合身的話會增添累贅的感覺。