日本時尚達人示範60歲穿搭 從不掩飾白髮&皺紋 靠黑白藍營造簡約現代感
年紀愈大，衣著選擇愈來愈少，穿搭只能夠變得平淡無趣？日本時尚達人MASAKO話你知，年紀大唔代表要放棄打扮，年屆60幾歲的她經常響社交平台分享日常穿搭，簡單得來又有型，難怪吸引了超過5萬個追蹤！
MASAKO的女兒響幾年前在Twitter分享了幾張媽媽的日常穿搭照，照片中MASAKO著住白色T恤，黑色長版型襯衫同半截裙，配上黑色太陽眼鏡加一頭銀白色鬈髮，簡單得來十分有型，令依幾張相瞬間獲得超過8萬人按讚同轉載，MASAKO就咁樣意外成為時尚網紅，繼而建立自己的社交平台分享日常穿搭。
MASAKO的照片唔靠美肌，從來無掩飾過自己的白頭髮同埋皺紋，雖然歲月在她身上留下痕跡，卻絲毫無損她充滿現代感的時尚造型。雖然無模特兒的身型或標緻的外貌，但憑住自信同自在的生活態度，MASAKO真正演活了「人著衫，唔係衫著人」。她的日常衣服通常都係用白色 T 恤為底，再配上黑色、藍色或白色，簡單的造型配上搶眼的配件，就已經突出又好睇。
MASAKO女兒指，好多人睇媽媽的相片會誤以為她係一位貴婦，但事實上她們家唔係大家想像中咁富裕，媽媽以前都捱得好辛苦，係近年先意識到人生意義，決定開始過自己想要的人生，所以縱然已經60歲，都仍然建立社交平台分享照片。
她在社交平台的個人簡介上寫著：「I love fashion」。對時尚的熱愛，不因年紀而改變，唔少人都好欣賞她能夠堅持做自己、追求鍾意的時尚，唔因為年紀大了而唔敢嘗試，亦唔會介意別人的睇法。MASAKO的穿搭技巧固然值得學習，但她那種自在隨性的人生態度先係最吸引人的地方，只要能活出真實的自我，年紀再大又有咩好怕！