長期睇手機好傷眼睛 拯救視力！快速護眼3式
大家一日會睇幾多個鐘手機／平板電腦呢？粗略估計一下，可能至少有4、5個鐘！長時間睇近距離事物，好易造成眼睛疲勞不適，今日就教大家3式護眼操拯救視力。
眼睛長時間近距離睇手機或者平板電腦，好易令到調節焦距的睫狀肌同埋控制眼球運動的眼外肌疲勞，繼而造成眼睛不適、視力模糊、眼乾眼痠等等，甚至有機會加劇老花症狀！透過做護眼操，可以有效放鬆眼球肌肉，促進血流循環，紓緩眼睛不適。3式護眼操好簡單，全程可以戴住眼鏡或隱形眼鏡，只要覺得眼攰眼乾隨時都可以做！
超簡單3式護眼操
第 1 式：兩秒眨眼操
緊閉雙眼，做出鬥雞眼的狀態，維持兩秒。然後張開眼看向前方，並抬起眉毛，同樣維持兩秒。重複整套動作5次。
好處：反覆地大動作眨眼可刺激同放鬆眼周肌肉，促進血液循環同淚液分泌，紓緩乾眼症。
第 2 式：望近又望遠
先望近距離景物：將手指公舉起，注視5秒；再望遠距離景物：將視線調到3公尺以外的景物，注視5秒。重複以上動作5次。
好處：
眼睛在調節焦距的同時，有伸展眼部肌肉的作用，可以令肌肉得到放鬆，變得柔軟。
第3式：轉動眼球
伸出右手，用指尖在前方畫一個大圓形，眼球跟著指尖移動，但注意唔好郁條頸。用右手畫兩次圓形後，換左手畫兩次。重複以上動作5次。
好處：
長期睇手機只係活動到少量眼部肌肉，依個動作可以令眼球大幅度轉動，活動到眼球附近較少用到的肌肉。
護眼操宜慢慢做
做護眼操時千祈唔可以心急，要慢慢做，尤其是深近視或者有視網膜剝落風險人士，一定唔可以快速轉動眼球，因為急速震動有機會造成視網膜剝落。放慢速度為上策，紓緩眼部疲勞同時唔會造成危險。