【湯水食譜】粟米雪耳淮山瑤柱湯　健脾潤肺潤膚養顏　唔落肉都夠甜

宅在家想飲湯，咁就當然係睇下屋企有啲咩材料就用盡佢，好在之前都買定啲煲湯料，再加埋前日買左兩條粟米，咁就夠晒煲返個粟米雪耳淮山瑤柱湯，健脾胃之外，又可以潤潤肺！

材料：

粟米……… 2條
乾瑤柱…… 5粒
漳州雪耳… 一両
淮山……… 一両
腰果……… 約一飯碗
椰棗……… 4粒
南北杏…… 半両
陳皮……… 一角

做法：

1. 粟米洗淨切段。

2. 雪耳浸透，然後剪去硬蒂再剪細舊。

3. 陳皮浸軟後刮瓤。

4. 乾瑤柱洗乾淨浸半小時，然後摵為絲。

5. 其他材料浸洗一陣。

6. 煲內放約 2.5L 水，然後隨水加入陳皮。

7. 待滾起後，加入所有材料。

8. 待再次滾起後，繼續用大火加蓋煲約 15 分鐘。

9. 之後轉慢火加蓋煲多 1.5 小時。

10. 最後加鹽調味，就可以飲得啦。真係少少就可以，因為本身乾瑤柱都帶點咸味呀！

雪耳絕對係小小豬至愛，因為我成日都逗佢話食左雪耳會靚仔，所以佢一見到就會心心眼狂食呀…哈哈哈！

啖湯雖然冇落肉但就用左乾瑤柱，再加埋粟米嘅香，所以但啖湯都勁甜，三口子話咁快就KO晒成煲湯啦！

以下係各食材嘅功效，可以參考一下呀 (網上資料)：

粟米 – 健脾和胃，利水通尿，益肺寧心。

乾瑤柱 – 有助降血壓、降膽固醇及補益健身。而且還具有抗癌、軟化血血管及預防動脈硬化等功效。

漳州雪耳 – 有助潤肺、潤膚同養顏嘅功效。

淮山 – 健脾開胃，其他好處為治療久泄久痢、肺氣虛燥、及消渴尿頻等症。

椰棗 – 可補中益氣、止咳潤肺、補血等。

南北杏 – 可止咳下氣，潤燥消積。

陳皮 – 理氣健脾、燥濕化痰。

腰果 – 素湯加入腰果，可令湯更鮮甜濃稠，卻不會像肉湯般油膩。