世界最長壽人瑞去世享壽118歲 失明坐輪椅仍熱心助人：分享愛係最重要的事
健力氏世界紀錄現今最長壽人瑞修女Lucile Randon近日去世，享壽118歲又340天。Randon亦係新冠肺炎確診者中，最年長嘅倖存者。
Randon響1904年2月11日出世於法國東南部的阿萊斯市，年輕時做過老師、家庭教師，二戰期間幫忙照顧兒童。41歲進入修道院，獲得「安德烈修女 (Sister André) 」嘅稱號，被派到一間醫院服務咗31年，直到70幾歲先搬到法國南部沿岸城市嘅安養院。
安德烈修女一生大部份時間都致力服務大眾，甚至響失明要坐輪椅之後，仍然經常照顧其他細過佢嘅老人，因為佢認為持續分享偉大嘅愛，向有需要嘅人伸出援手，係最重要嘅事。
除咗係現存最長壽人瑞同最年長修女之外，安德烈修女亦係新冠肺炎確診者中，最年長嘅倖存者。佢一生人經歷過1918年西班牙流感大流行，又響2021年1月確診新冠肺炎，不過佢除咗感覺疲倦之外，並無任何病徵，而且響3星期後康復，迎接117歲生日。
安德烈修女曾經講過佢並唔恐怕死亡，雖然好開心活在人世，但亦非常渴望同天上嘅家人團聚。以前曾經有人想索取安德烈修女嘅DNA，以研究長壽嘅秘密，不過都被佢一一拒絕，佢話：「我都唔知點解自己咁長命，長壽嘅答案只有上帝知道。」
雖然安德烈修女離世前係世上已知最長壽人瑞，但根據健力士世界紀錄，有史以來最長壽人類嘅紀錄由法國女性Jeanne Louise Calment保持，佢出生於1875年2月21日，享壽122歲又164天。