【湯水食譜】青木瓜百合蓮子雪耳瘦肉湯　健脾潤肺、潤膚養顏

今晚奶奶嚟食飯，緊係要煲啖靚湯俾佢飲 (間唔中都要扮下乖嘅..哈哈)，咁主角就當然係佢鐘意飲嘅青木瓜，之後我就簡單啲加埋百合、蓮子同雪耳，嚟返一個健脾潤肺又勁滋潤嘅靚湯啦！

材料：

青木瓜…… 1個
漳州雪耳… 半両
沙參……… 半両
玉竹……… 半両
百合……… 一両
蓮子……… 一両
無花果…… 4粒
紅棗……… 10粒
瘦肉……… 約$50

做法：

1. 青木瓜去皮去核之後切塊，切嘅時候最好切大件少少，咁煲起之後都可以有得食木瓜。

2. 漳州雪耳浸洗後去蒂切細件。

3. 紅棗洗乾淨後去核。

4. 其他藥材浸洗一陣。

5. 瘦肉洗淨汆水備用。

6. 煲內放約3L水，待水滾後加入所有材料。

7. 待滾起後，繼續用大火加蓋煲約15分鐘。

8. 之後轉慢火加蓋煲多1.5小時。

9. 最後加鹽調味，就可以飲得啦。

簡簡單單又好飲，最重要係小小豬同奶奶都鐘意，加上青木瓜同雪耳又可以當一個餸嚟食，咁我又可以諗少一個餸，所以依個湯絕對係WIN WIN之選呀！

以下係各食材嘅功效，可以參考一下 (網上資料)：

青木瓜 – 健脾和胃及增強抵抗力，能保護胃腸黏膜及預防消化道潰瘍。對胃炎、便秘及肺燥咳嗽人士均有益。

漳州雪耳 – 有助潤肺、潤膚同養顏嘅功效。

沙參 – 有助養陰清肺及益胃生津。

玉竹 – 則能養陰潤燥，生津止渴。

蓮子 – 有益心健脾，補腎及安神之效。

百合 – 具理脾健胃、利濕消積等功效。

紅棗 – 具有補脾和胃、益氣生津、養血安神之功效。

無花果 – 具有抗發炎、消水腫、促進消化、抗癌、降血壓及降血糖、潤腸通便等功效。