【秋冬滋潤素食食譜】蘋果雪梨乾桔餅茶　化痰止咳、生津潤肺

依排真係乾到爆，家中兩位老細成日都話周痕，再加上天氣轉嚟轉去攪到氣管敏感喉嚨痕痕，都係時候要做下嘢。

見屋企有雪梨乾同桔餅，咁就再買埋蘋果，煲返一個化痰止咳、生津潤肺嘅蘋果雪梨乾桔餅茶，咁就嚟三口子潤一潤啦！

材料：

桔餅……… 2個
蘋果……… 3個
雪梨乾…… 約兩両
無花果…… 4粒
南杏……… 一両
陳皮……… 一角

做法：

1. 蘋果洗淨去核及切粗粒 (記得要係洗蘋果前用刀刮一圈，刮走面嗰一層果蠟)。

2. 陳皮用水浸至軟身，然後刮囊。

3. 雪梨乾、南杏及無花果浸洗一陣。

4. 桔餅洗淨然後切塊。

5. 煲內放 1L 水，然後加入陳皮。

6. 待水滾後就可以加入其他材料。

7. 待滾起後，繼續用大火加蓋煲約 15 分鐘。

8. 之後轉慢火加蓋煲多 1 小時。

9. 最後熄火再焗多大約 5 分鐘，咁就可以飲得啦。

其實桔餅、蘋果同雪梨乾依個配搭我分別都有煲過，不過三樣加埋一齊煲都係第一次，但煲出嚟個味我覺得就係咁多次係最好飲，飲落甜甜地又帶少少桔餅嘅咸，依一煲茶唔洗一晚就俾我地KO晒啦！

以下係各食材嘅功效，可以參考一下 (網上資料)：

桔餅 – 有理氣、化痰、止咳功效，含豐富維生素A和C，對風寒咳嗽，氣管敏感，支氣管炎皆有紓緩作用，健胃助消化，潤肺和預防哮喘。

蘋果 – 有生津止渴、潤肺除煩、健脾益胃、養心益氣、潤腸、止瀉、解暑、醒酒等功效。對兒童生長發育有益，能促進生長及發育。

雪梨乾 – 有止咳化痰、潤肺、生津潤燥及清熱功效。雪梨本身屬寒涼之物，但雪梨乾經過烤焗後反而潤而不寒，比較適合小朋友及老人家。

無花果 – 以潤肺利咽、理氣祛痰、改善偏熱的口乾、喉嚨痛、開胃止瀉及潤腸通便等多個功效。

南杏 – 潤肺、止咳及平喘，亦可生津開胃。

陳皮 – 有通氣健脾，消滯健胃的功能。