【湯水食譜】黑豆雜豆牛尾湯：補腎、去水腫、改善夜尿　素食者可用依樣代替

金銀島而家有Whatsapp群組喇！群組內唔少島友熱心分享自己嘅心得同經驗，最近島友Maria就無私分享有補腎、去水腫功效嘅湯水食譜——黑豆雜豆牛尾湯，想知點煲就睇落去啦，文末仲會講解依個湯水嘅好處！

材料：

黑豆……… 裝滿一碗飯碗的份量
雜豆 (眉豆、扁豆、綠豆、赤小豆、薏仁 ) …… 份量為單手一大執
牛尾……… 12塊 (建議揀肉多骨少，避免太大嘅骨)
紅棗……… 大粒8隻／中粒10隻／小粒12隻
杞子……… 份量為單手一執

*素食者可用豆腐或西洋菜取代牛尾

做法：

1. 黑豆洗乾淨後，用湯碗盛著，並用食水浸過面 (水比豆高一吋)，放雪櫃浸過夜備用。

2. 雜豆洗乾淨後，用湯碗盛著，並用食水浸過面 (水比豆高一吋)，放雪櫃浸過夜備用。

3. 牛尾宜選用肉多骨少，避免太大的骨。自然解凍後剪走肥膏，不用飛水。

4. 杞子洗淨，紅棗去核後備用。

5. 用10碗清水，先煲黑豆、雜豆40分鐘。

6. 加入牛尾一同再煲45分鐘。

7. 加入紅棗和杞子再煲25分鐘。

8. 撇走湯面的雜質，待湯水收水後有膠質出現便完成，不用加鹽。